Súkkulaðikakan hennar Þrúðar

Written by on in Bakstur

Þessi kaka er án efa ástæðan fyrir því að vefsíðan okkar var stofnuð. Hún hefur verið í fjölskyldunni í mörg ár og virðist alltaf hitta í mark þar sem fólk biður alltaf um uppskriftina.

Lykilhráefnið í kökunni er íþróttasúrmjólkin, en hún gerir kökuna silkimjúka og þétta. Vanalega bökum við hana í skúffukökuformi en í þessu tilfelli ákváðum við að pimpa hana aðeins upp og settum hana í hringlaga form.

UPPSKRIFT
Print

UPPSKRIFT

SÚKKULAÐIBOTN

  • 4 ½ dl sykur

  • 175 gr lint smjör

  • 3 egg

  • 4 ½ dl hveiti

  • ½ tsk lyftiduft

  • 1 tsk matarsódi

  • 1 tsk salt 

  • 1 dl kakó

  • 1 ½ dl mjólk 

  • 3 tsk vanilludropar

  • 2 dl íþróttasúrmjólk



  • KREMIÐ

  • 100 gr smjör

  • 3 msk af heitu vatni

  • 3 tsk vanilludropar

  • 5-6 dl flórsykur

  • 3 msk kakó

Aðferð VIÐ Súkkulaðibotninn

  • Stillið ofninn á 200°C með undir og yfir hita.
  • Þeytið saman smjörið og sykurinn í dágóðan tíma þar til það verður ljóst og smjörið búið að blandast vel við sykurinn. Ef smjörið er kalt er hægt að skera það í litla bita, setja þá á disk og skál yfir og ylja það í örbylgjuofninum í örfáar sekúndur.
  • Bætið eggjunum við, einu í einu, og hrærið.
  • Blandið þurrefnunum saman í skál og blandið saman við.
  • Bætið við mjólkinni, íþróttasúrmjólinni og vanilludropunum saman við. Passið að skafa niður hliðarnar á skálinni til að allt blandist vel saman.
  • Færið deigið yfir í  smurt eldfast mót og setjið inn í ofninn í
    20-30 mínútur. Hringlaga mótið sem við notuðum fyrir þessa uppskrift var 26 cm, en við höfum prófað að setja í hana í tvö hringlaga mót sem voru 24 cm og í ferkantað mót sem var 20×30. Þessi uppskrift hentaði fullkomlega fyrir öll þessi mót.
  • Til þess að kanna hvort að kakan sé tilbúin er gott að draga ofnskúffunna úr og ef miðjan í kökunni virðist hristast þá þarf kakan lengri tíma

  • AÐFERÐ VIÐ KREMIÐ
  • Þegar kakan hefur kólnað er hægt að byrja á kreminu. Bræðið smjörið í potti og bætið 3 msk af heitu vatni við.
  • Færið pottinn af heitu hellunni og bætið vanilludropunum, 3 dl af flórsykri og kakóinu við og hrærið vel með pískara.
  • Þykktin á kreminu er alveg undir þér komið þannig við mælum með að restin af flórsykrinum sé bætt við 1 dl í einu og ef kremið er of þykkt má bæta smá volgu vatni við til að þynna.

Njótið ♡